Taliwala sa pandemya, padayong nakatutok ang lokal nga gobyerno sa Sarangani Province sa pamunuan ni Governor Steve Chiongbian Solon ug sa administrasyon ni Pangulong Rodrigo Duterte alang sa kaayuhan sa mga kanhing rebelde ug kadtong buot nang mamalik sa sabakan sa balaod.
Alayon sa gilatid sa Local Government Code nga anaa sa provincial government ang mandato nga muhatag og programa sa mga kanhing rebelde subay usab sa Executive Order No. 70 nga gipagawas ni Presidente Duterte kabahin sa Whole-of-Nation Approach to End Local Communist Armed Conflict kon ELCAC (el-kak) o ang paghunong sa insurhensya ug terorismo pinaagi sa hiniusang pagtinabangay sa mga ahensya sa gobyerno ug mga katawhan, nagpabilin ang E-CLIP kon Enhanced Comprehensive Local Integration Program sa probinsya sa Sarangani nga nagtan-aw sa kalambuan sa hut-ong sa mga rebel returnee, ilalum sa buhatan ni Provincial Social Welfare and Development Officer Raquel Panal sa pagdumala ni focal person Ms. Lizette Lopez.
Bag-uhay lang, laing batch sa mga former rebel setentay dos (72) sila tanan ang nakadawat og ayudang pinansyal sulod sa Sarangani Capitol Gymnasium.
Mismong si DSWD 12 Regional Director Cezario Joel Espejo ang nitunol og Singko Mil ka pesos (P5K) matag usa isip financial assistance ngadto sa singkwenta (50) kabuok kanhing rebelde, kadtong nanurender sa niaging panahon gikan tuig 2015 paubos.
Samtang, baynte dos (22) pud ka mga indibidwal ang naka-angkon og Saysentay Singko Mil ka pesos (P65K) kada usa isip livelihood ug immediate assistance gikan sa DILG, kadtong mga nanurender gikan tuig 2016. Gihikay na usab ang mga papeles aron mahatag na ang financial remuneration isip bugti sa gitahan nila nga mga armas.
Malipayon na lamang nga gibalita ni Focal Person Lopez, ang gituboy ni Governor Solon nga pangunahan ang programa sa E-CLIP ug ELCAC ilalum sa iyang Sulong Kapayapaan program, nga karong tuiga madawat na sa dise sais (16) ka mga barangay sa Sarangani Province ang Baynte Milyones ka pesos (P20M) matag barangay nga ayuda gikan sa nasyonal nga gobyerno sa nagpadayong programa ni Pangulong Duterte sa kalinaw.
Ang maong pondo nga Baynte Milyones ka pesos ang gamiton sa barangay sa pagpalambo pa sa ilang lugar basi sa barangay development plan. Walay daghang ma-engganyo sa walhong grupo ug mga naglihukan kung malambuon na ang mga komunidad.
Sa habig ni Congressman Ruel Pacquiao, nakadayig kini sa padagan ni Governor Solon kuyog ang pito (7) ka mayor. Paghigugma sa katawhan sa lamdag sa Ginoo matud pa ang gipakita sa pamunuan ni Governor Solon aron padayong makadani og mga tao nga mukanaog na.
Isip kongresista, hugot iyang pakigtambayayong sa mga LGU ug sa mga kasundaluhan ug kapulisan aron makapang-apud apod og mga ayuda ngadto sa mga kanhing rebelde sa Sarangani, ilalum sa iyang programa nga Ronda Probinsya, sa paghatag og mga kagamitan sa panguma, mga hayop ma-alima, mga binhi ug daghan pa, kaabag ang mga ahensya sa gobyerno, sa pagsuporta kana nila Senador Manny Pacquiao, Vice Governor Elmer De Peralta ug tanang board member.
(Provincial Information Office – Sarangani)