Cebu City – Miabot na ang unang tranche sa Sinovac vaccines alang sa Sugbo sakay sa eroplano sa Philippine Airlines alas 7:44 sa buntag, Martes, Marso 2, 2021.
Nag convoy ang van nga gikargahan sa vaccine uban sa sakyanan sa kapolisan ug mi-abot kini sa Vicente Sotto Memorial Medical Center (VSMMC) alas 8:20 sa buntag, sud sa gitakdang minuto nga tagal sa pag byahe.
Matod ni Dr. Mary Jean Loreche, tigpamaba sa Department of Health (DOH)-7 nga mokabat ug 7,200 doses sa vaccine alang kini sa medical frontliners sa Vicente Sotto Memorial Medical Center (VSMMC).
Sigon pa ni Dr. Loreche nga kung dunay masobra nga vaccine ila kining ihatag sa DOH retained hospital.
Gibutyag niini nga kung dunay laing brand nga moabot, duna poy allocation ang Central Visayas ug magsunod ang region 6 ug 8.
Kini kay matod pa gi prioritize ang naa sa covid facilities.
“Siguro Thursday na magsugod ang inoculation, diha pa makit-an, pwede na ma determine ug pila ang magpa bakuna,” mensahi ni Dr. Loreche.
Ang 7, 200 doses sa Sinovac vaccines nga naa karon sa VSMMC tipik sa 600,000 nga donasyon sa kagamhanan sa nasud sa China nga alang sa Pilipinas.
Pag-abot sa maong mga vaccines sa VSMMC kaganinang buntag, gi check kini ug gi disinfect sa mga staff sa wala pa gibutang sa ilang refrigerated facility. (Jhon Tadlip/JTY)
(Source: Department of Health-7, photo courtesy of PTV4)
