Cagayan de Oro City- Moabot unom ka mga konbiktado nga gibuhian silong sa good conduct time allowance o GCTA ang mitahan sa ilang kaugalingon ngadto sa otoridad sa Amihanang Mindanao sukad sa nakalabay mga semana. Matud pa sa kapolisan ang unom ka mga piniriso nalambigit sa mangilngig nga krimen sama sa pagpatay, paglugos, rape with robbery, robbery with homicide ug rape and arson.
Sa unom, upat ang misurrender sa Bukidnon, usa gikan sa Camiguin ug laing usa sa Lanao del Norte.
Ang pinakaulahing misurender mao ang taga barangay Tongantogan, Valencia City, Bukidnon, nga gi-identify sa kapolisan nga si Elias Berdin, 61 anyos ang panuigon nga konbiktado sa murder ug frustrated murder niadtong Agosto 5, 1993. Kasamtangan siyang gipailawom sa kustodiya sa Valencia City Police. Si Berdin mao ang ikaduhang binilanggo nga misurender sa Valencia City. Sa miaging semana ang convicted rapist ug arsonist nga si Larry Canunay mao ang mitahan sa otoridad.
Matud pa ni Lt. Col Surki Sereñas, ang hepe sa Valencia City Police nga ang pagsurrrender sa mga piniriso basehan sa ilang pagtahod sa otoridad, gawas nga maayo ang ilang pagbuhi.