Butuan City – Sikop ang upat ka mga suspetsadong tulisan atol sa hot pursuit operation alas 11:00 kagahapon sa buntag, Abril 13 sa Purok 6, Barangay Ampayon.
Ang mga suspek ang gitudlong mitulis sa usa ka 26-anyos nga si Raymark Babor Codaste, usa ka Liason Officer.
Subay sa report sa Butuan City Police Station 4 gikan sa BDO bank sa Montilla Boulevard ang biktima sakay sa usa ka motorsiklo, pag-abot sa maong lugar, giduol kinis upat ka mga suspek sakay sa duha ka motorsiklo ug mideklarag hold up.
Pugsanong gikuha ang bag sa biktima unod ang kapin ₱900,000 nga cash dayon sibat.
Giila sa Butuan City Police Station ang mga suspek nga silas George Dalapo Javerez, 46-anyos taga Purok Bayanihan, Brgy. Banaybanay, Davao Oriental, Gemar Solidaga Tipan, 36-anyos taga Bucana Piso, Banaybanay, Davao Oriental, Llyod Nubbin Banquisio, 29-anyos taga Purok 4, Calubihan, Banaynay, Davao Oriental ug Manilito Paragas Linda, 42-anyos taga Purok 2, Del Pilar, Mabini, Compostela Valley.
Narekober sa mga pulis ang bag ug kwarta sa biktima samtang nakuha gikan sa mga suspek ang duha ka caliber .45, pitaka nga may mga nagkalain-laing ID ug 4 ka mga cellphones.
Anaa na sa kustodiya sa Butuan City Police Station ang mga suspek. (Camille Santos Naraga)
(Source: Butuan City Police Station 4)