Upat ka lungsod ug usa ka syudad sa Misamis Oriental nga mao ang mga lungsod sa Jasaan, Lagonglong , Salay,
Opol ug El Salvador ang nagpagawas og kamandoan nga temporaryong isirado ang mga publikong patigayon lakip na ang paghunong usa sa mga operasyon sa nagkalain laing tourist destination sa ilang lungsod.
Sa pagtaas sa kaso sa Covid-19 sa lungsod sa Jasaan nagpagawas og kamandoan si Mayor Redentor S. Jardin kon diin nakalatid sa iyang kamandoan nga sirhan ang mga resort sa lungsod lakip ang mga gym.
Gidili ang pag-zumba ug uban pa nga mga pagtapok sulod sa duha ka semana, gilimitahan ang mga haya sa 3 ka adlaw ra ug dili molapas sa 30 ka tawo alang sa mga lubong ug ang mga indibidwal nga nag-edad 15 years old paubos ug 65 years old pataas gidid-an sa pagawas ug magpuyo lamang sa balay.
Samtang usa ka Executive Order (EO) No. 123 ang gipirmahan sa Local Chief Executive nga si Hon. Angelo Capistrano Jr. sa lungsod sa Salay kon diin iyang gipagawas ang kamandoan nga temporaryong isuspenso ang tanan nga mga kalihokan gumikan sa taas nga pagsaka sa kaso sa Covid-19 dili lang sa lungsod apan sa tibouk lalawigan labina sa Cagayan de Oro.
Ang opisina sa Municipal Disaster Risk Reduction Management kon MDRRM kauban ang PNP miadto sa Resorts ug Balsa Operators sa Brgy. Dinagsaan, Brgy. Ampenican, Brgy. Inobulan, Brgy. Ili-ilihon, Brgy. Poblacion ug ugma sa Brgy. Matampa aron mahatag nga husto ang ilang kopya sa nahisgutan sa EO ug hingpit kining mapatuman.
Sugod sab sa Mayo 19, 2021 ang munisipyo sa Lagonglong pinaagi sa kamandoan ni Mayor Jay Albert Puertas ubos sa EO NO. 151 S. 2021, temporaryong gimando niini nga sirhan ang mga tourist spots sama sa beaches ug spring resort kutob sa Hunyo 2, 2021.
Lakip sa gimando sa mayor nga likayan ang pagsaulog sa mga selebrasyon nga mosangpot sa panagtapok, temporaryong isirado ang mga internet cafes, misa ug uban pa. Curfew ug liquor ban lakip sa gipatuman.
Ang Provincial Inter-Agency Task Force ubos ni Dr. Jerie Calingasan padayon sa paghangyo sa Misamisnon nga mokooperar aron mapugngan ang pagsaka sa kaso sa lalawigan.
(Provincial Information Office – MisOr)