CAGAYAN DE ORO CITY- Moabot sa 39 ka mga pasyente ang nakahimo sa pag-contact sa medical practitioners sa City Health Office sukad niadtong Biyernes, April 24 pinaagi sa telemedicine/teleconsultation diin 13 niini ang narecord isip acute respiratory illness (SARI) Cases. Hinuon, matud ni CHO Officer-in-Charge Dr. Lorraine Nery nga ang maong mga pasyente dili suspected cases sa Covid-19. Sila gihatagan na sa insaktong tambal ug pag-atiman sa ilang gipangbati, dugang pa ni Nery.
Ang Telemedicine/Teleconsultation bag-ohay pa lang gilusad sa mga doctor, nurses sa medical practitioner sa City Health Office niadtong Abril 22. Ang mga pasyente pwede maka-access sa ilang serbisyo pinaagi sa FB page: CDO CITY HEALTH OFFICE DOCTORS. Sila modawat sa konsultasyon sa Health concerns matag lunes hangtud Biyernes. Gikan alas otso sa buntag hangtud alas singko sa hapon. Samtang sa pikas bahin, ang CHO nakarecord sa 38 ka mga bag-ong persons under monitoring (PUMs) Gikan sa ilang close contacts sa persons under investigations (PUIs) ug Covid-Positive Patients nga na-admit sa mga hospitals.
Kini maoy nakapahimo tanan sa total sa PUMs nga moabot sa 261 sukad niadtong Abril 24.