Kutob karong adlawa, adunay 34 ka COVID-19 patients sa Zamboanga del Norte Medical Center ang naka-recover ug nakagawas na sa maong tambalanan sukad kini na-admit sa miaging bulan.
Kini ang nasayran gikan ni Doctor Esmeralda Nadela, ang Acting Hospital Administrator sa Zamboanga del Norte Medical Center.
Dugang ni Dr. Nadela nga aduna usay 18 ka COVID-19 patients ang nagpabilin sa maong tambalanan kutob ning pagbalita ug anaa sila sa maayong kondisyon.
Niini, si Dr. Nadela ang nagpasalamat sa mga health workers ilabi na nila Dr. Rose Portia Zerrudo Ompoy ug Dr. Rosinee Monte sa ilang walay puas nga serbisyo alang sa COVID-19 patients, mga nurses kinsa miatiman sa maong mga pasyente ug ang mga tig-limpyo sa maong isolation ward nga kanunay gihimong  limpyo ug hapsay ang maong isolation ward ilabi na sa Labaw’ng Makakagahum.
Sa nasayran gikan sa Task Force COVID-19, ang Zamboanga del Norte nakatala karon sa 250 COVID-19 cases, 61 ang active cases, 174 recoveries ug 15 ang nakabsan sa ilang kinabuhi gumikan sa maong sakit.
Si Dr. Esmeralda Nadela, ang Acting Hospital Administrator sa ZNMC subling nagpahimangno sa publiko aron malikayan ang pagkuyanap sa COVID-19, magpundo lamang sa balay kung walay importanteng tuyo sa gawas, batasanon ang paghugas sa kamot gamit ang sabon ug tubig o dili ba mogamit sa alcohol ug hand sanitizer, kanunay magsuot sa face mask ug face shield, magmintinar sa social distancing kung anaa sa pampublikong lugar.
(Provincial Information Center-mbmontederamos)
