Pinasisibak ng Ombudsman ang tatlong opisyal ng Bureau of Corrections (BuCor) dahil sa kontrobersya ng Good Conduct and Time Allowance (GCTA) law.
Batay sa inilabas na petisyon ni Ombudsman Samuel Martires, guilty of grave misconduct, prejudicial to the best interest of service at dismissed from service sina BuCor inmate documents section chief Ramoncito Roque, senior inspector Maria Belinda Bansil at corrections officer Veronica Bustamante Bunio.
Dahil dito, pinasasamsam na ng Ombudsman ang kanilang retirement benefits, kanselasyon ng kanilang eligibility, pagbabawal sa pagkumuha ng civil service examination at diskwalipikado na rin ang mga ito na humawak na kahit anong posisyon sa gobyerno.
Nauna nang pinatawan ng Ombudsman ng anim na buwang suspensyon ang tatlong opisyal dahil parin sa GCTA controversy.
Samantala, ipinag-utos na rin ni Ombudsman Martires ang pagsasampa ng kasong katiwalian at direct bribery laban sa tatlo sa Muntinlupa Regional Trial Court.
