Surigao City – 47 ka mga tunghaan ang mosalmot sa Mayor’s Cup karong tuiga – 2nd Batang Surigaonon Inter-school Tournament.
Atol sa opening ceremony nga gipahigayon jadton Marso 23, 2024, ang mga estudyante, coaches, ug trainer gikan sa publiko ug pribado nga mga eskwelahan nagtapok aron sugdan ang tinuig nga sports event.
Ang seremonyas sa pagbukas gitambungan sa mga tinahod nga bisita, apil sila si City Councilor Karl Duane Casurra, Surigao City Division Sports Coordinator Dr. Tessie Dolores, Provincial Youth Development Officer Vanessa Dubduban, SK Federated President Jenelyn Edulzura, mga principal gikan sa lain-laing mga eskwelahan, ug Sports Coordinators gikan sa Surigao City Sports Development Office Henry Villamor ug Ronel Dematera.
Ang Panggamhanan sa Dakbayan sa Surigao, ubos sa paggiya ni City Mayor Pablo Yves L. Dumlao II, nahimong instrumento sa pag-organisar sa mga kalihokan sama sa Mayor’s Cup, nga nagsilbi nga plataporma sa pag-amuma sa pag-apil sa mga kabatan-onan sa sports. Gikan sa basketball, volleyball, chess, futsal, badminton, table tennis, ug lawn tennis, ang mga duwa gisaaran nga usa ka showcase sa talento, determinasyon, ug teamwork. (Mark James Lisondra)