Cebu City – Gibuksan sa kagamhanan sa Syudad sa Lapu-Lapu ang bag-ong nadugang sa kasamtangan nga mga Covid-19 Isolation Facility, pinaagi sa usa ka blessing kaganing buntag, Miyerkules, September 22, 2021.
Kini ang gibutyag ni Mayor Junard “Ahong” Chan pinaagi sa iyang FB page.
Matod ni Chan nga ang maong Isolation Facility anaa kini nahimutang sa Mactan National High School nga adunay capacity nga 260 beds para sa mga mild to moderate COVID positive patients.
“Ang matag room kompleto sa mga basic nga kagamitan nga labing gikinahanglan atol sa isolation period sama sa higdaanan, lamesa, electric fan, pagkaon ug aduna sab ni kaugalingon nga comfort rooms,” pahibaw ni Chan.
Arong pagsiguro nga walay laing tawo nga masayop og dapit sa maong luga, adunay gibutang nga mga CCTV cameras nga mag monitor sa kalihukan sulod sa facility.
Gipahibaw sab sa mayor nga ang mga buildings nga ilang gipili adunay igong distansya nga layo kaayo sa koral sa compound aron dili kini problema sa mga residente nga nagpuyo sa dool.
“Nagpasalamat ako sa Head sa atong DRRMO nga si Nagiel Banacia sa pag-atiman nga mahuman sa labing daling panahon ang atong isolation facility pinaagi sa tabang ni Andy Berame,” pasalamat sa mayor.
Iya sab nga gipasalamatan nga mitambong sa blessing nga sila si Vice Mayor Celedonio “Celsi Sitoy ug Jun Alforque.
Nonot sa maong kalamboan, gi aprobahan na sab ang Supplemental Budget No. 3 sa konseho sa syudad, apan gitipakan kini.
Gikan sa P81 milyones nga kinatibuk-ang pahat, duna lay ₱ 58.5M ang gi aprobahan, diin dakong parti niini gastohon alang sa kampanya batok sa Covid-19.
Sa kasamtangan nagsilbi karon ang Lapu-Lapu City College ug ang Hoopsdome nga pulos nahimutang sa Barangay Gun-ob isip mga Isolation Facility sa syudad.
(News & photo courtesy of Junard “Ahong” Chan Facebook page)