Cagayan de Oro – Hinay-hinay na nga matubag ang liboan ka housing backlog ning syudad pinaagi sa katukoran sa mokabat 2,200 condo type housing units diha sa Pagatpat Valley Residence sa Sitio Pamalihi, Barangay Pagatpat.
Kini human gisubhan adlaw’ng Lunes, Marso 18, 2024, nga gipangulohan ni Mayor Rolando `Klarex’ Uy, Vice Mayor Jocelyn Rodriguez, Majority Floor Leader City Councilor Edgar Cabanlas, mga miyembro sa 20th City Council, Social Housing Finance Corporation (SHFC) Cagayan de Oro Manager Janet Lumayag, Department of Human Settlement and Urban Department (DHSUD) Regional Director Ariel Abragan, Richard Lim, president & CEO sa Johndorf Ventures Corp., uban ni Atty. Samuel Rollo, department manager sa City Housing and Urban Development Department (CHUDD).
Sa iyang mensahe, gipasalamatan ni Mayor Klarex ang mga partner agencies nga nagtinabangay aron matuman ang katukoran sa maong low cost housing alang sa mga kuwalipikadong buyer beneficiaries, ilabina ang mga pamilya nga apektado sa JICA-DPWH flood wall project.
“Mao kini ang akong tinguha nga maserbisyohan kanunay ang katawhan ug unahon ang pagtubag sa ilang panginahanglanon,” dugang ni Mayor Klarex.
Gipasabot ni Mayor Klarex nga dili niya kini mahimo kung wala ang suporta ug tabang sa ubang mga buhatan ilabina ang nasyonal nga kagamhanan.
Ang Johndorf Ventures mao ang motukod sa condo-type housing units, diin ang SHFC maoy mobayad kanila, samtang ang buyer beneficiaries sa SHFC usab mobayad sa ilang housing unit sa ubos lamang nga kantidad kay ang DHSUD mao man ang moabaga pagbayad sa interest sa balay ngadto sa SHFC.
Tumong niini nga mas mapagaan ang bayronon sa mga buyer beneficiaries diha sa ilang pag-angkon og desente nga pinuy-anan.
Human sa groundbreaking ceremony, capsule laying, ug unveiling sa project name, gihimo usab ang signing sa Memorandum of Understanding (MOU) tali sa syudad, Johndorf Ventures ug SHFC.
News and photo courtesy of CIO CDO
