Gidawat sa 200 ka mga benepisyaryo sa LAG (Livelihood Assistance Grant) sa dakbayan sa Dipolog ang tag ₱ 15,000.00 aron idugang og puhonan sa ilang tagsa-tagsa ka negosyo.
Ang pagpang-apod-apod sa ayudang pinansiyal gipangulohan ni Mayor Darel Dexter T. Uy ug SLP (Sustainable Livelihood Program) Regional Program Coordinator Hja Nursida Taradji Sarail didto sa Orchid Pavillon, Plaza Magsaysay ning dakbayan sa may alas 9:00 ang takna, Agosto 20 ning tuiga.
Atol sa maong kalihukan, mihatag si Sarail sa iyang mensahe diin gitambagan niini ang mga benepisyaryo nga likayan ang mga sakit sa negosyo nga mao ang AIDS kon “ As If Doing Something”, nga ang buot ipasabot kon dunay mopalit nga nagkatidad lamang og piso, dili panumbalingon, TB kon “Taong-Batugan” nga bisan udto na dili gihapon mabangon busa nakasirado ang tindahan nga moresulta sa pagka walay halin ug ikatulong sakit mao ang UTI kon “Umibig Tapos Iniwan” diin kon magkaproblema sa pamilya, dili resolbahon ang problema dayon magbulag og ipamaligya ang kabtangan. Dugang niya nga sa negosyo, kinahanglan nga dunay “unity, solidary ug teamwork” aron molambo ang panginabuhian.
Samtang si Mayor Uy usab midasig kanila nga magkugi kay kon kugihan, sumala niini, makab-ot gayod ang “goal” nga mo-asenso.
Gibutyag usab ni Alex Sabal, Provincial SLP Coordinator nga bugtong ang dakbayan lamang sa Dipolog ang nakahatag karon og tag P15,000.00 nga Livelihood Assistance Grant.
Sa wala pa gipanghatag ang ayudang pinansiyal, personal nga giturn-over ni Sarail ang Php3M cash nga maoy kinatibuk-ang pundo alang sa nasangpit nga programa.
Mitambong usab si kanhi Dipolog City Mayor Evelyn T. Uy isip representante ni Gov. Roberto Y. Uy lakip na usab sila si Bise-mayor Horacio Velasco, konsehal Marilou Calibo, CSWDO Arlene Jatico ug pipila ka hepe sa ubang buhatan sa kagamhanang lokal.
(News and photo courtesy of DIPOLOG CITY GOVERNMENT Facebook page)
