El mga autoridad ya aresta dos personas mas buscada na separao operacion de aplicacion de ley na provincia del Zamboanga del Sur, asegun con el policia del Sabado.
El mando regional del policia, o Police Regional Office-9 (PRO-9), ya identifica con el mga arestao personas mas buscada como canda Virgilio Soriano Abarquez y si Dennis Del Mar Corpuz Denaliso.
Asegun con el policia, si Abarquez listao como el numero ocho y si Denaliso como el numero tres personas mas buscada na provincia del Zamboanga del Sur.
Asegun con el policia, con Abarquez ya aresta na un operacion de aplicacion de ley por medio na implementacion de un orden de aresto mga alas 8:10 del Miercoles denoche na Purok Everlasting, Barangay Balimbingan, Labangan, Zamboanga del Sur.
El policia ya habla, si Abarquez tiene pendiente orden de aresto por el crimen dos cuentas calificado abuso carnal de un menor de edad que ya dale el un corte na ciudad de Pagadian, Zamboanga del Sur, del Febrero 24, 2025.
Asegun con el policia, con Denaliso ya aresta na semehante operacion de aplicacion de ley mga alas 8:17 del Miercoles denoche na Purok Pagasa, Barangay Lantian, Labangan, Zamboanga del Sur.
Asegun con el policia, si Denaliso tiene pendiente orden de aresto por el crimen del dos cuentas de estatutorio abuso carnal que ya dale el un corte na ciudad de Pagadian, Zamboanga del Sur del Febrero 24, 2025.
Asegun con el policia, ambos con Abarques y Denaliso ya pone bajo’l custodia del Criminal Investigation and Detection Group (CIDG) na Zamboanga del Sur. (B. Garcia)