Kagahapon adlawa pasado alauna kwarenta sa hapon sa dihang milandong og miagi ang kusog nga hangin sa bahin sa Litanville Phase 2 Extention, Barangay Sinawal General Santos City. Sa paghapak sa hangin, dayong nadunggan sa mga residente Ng lagubo sa ilang mga atop.
Sa pakighinabi sa RPN GenSan kang Jerry Matuan, natulog matod pa siya sa higayon sa insedente apan nakurat sa dihang mihayag ang lawak nga gikahimutangan. Diay giaswat sa hangin ang atop lakip ang suportang mga kahoy niini og gihagsa sa tupad nga balay. Mibuto usab ang iyang linya sa kuryente hinungdan nga nanawagan ang nahisgutan sa SOCOTECO 2 nga tan-awon ang maong linya ngadto sa poste. Gawas sa atop, guba usab ang kural sa iyang lote.
Samtang si Lilian Donaire nagatudlo sa iyang anak sa magtubag sa module nga gihatag sa tulunghaan sa dihang nakadungog og mga lagubo sa likod sa balay. Hikaplagan na lamang nila ang ilang kwarto nga wala na’y atop og nangabali ang mga kahoy. Gihagsa ang atop sa ilang balay sa katapad nga lote. Giangkon usab sa nahiagutan nga dugay-dugay na ang ilang balay apan dili matod pa siya katuo nga maguba kini sa kusog nga hangin.
Parihang nanawagan ang mga nahisgutan sa mga buot makatabang kanila ipaayo ang nangagubang mga atop. (Leo Martin Cellan, RPN DXDX GenSan)