General Santos City – Malampusong gipahigayon ang General Assembly sa 1Pacman Partylist karong adlawa, Oktubre 9, 2024 sa Family Country Hotel and Convention Center.
Lakip sa mitambong mao sila si Kongresista Mikee Romero sa 1Pacman Partylist, kanhi Senador Manny Pacquiao, General Santos City Mayor Lorelie Pacquiao, Konsehal Bobby Pacquiao nga maoy ikaduhang nominado sa partido, ug Gobernador Ruel Pacquiao, ang programa naglakip usab sa mga Mayor sa Sarangani Province, Punong Barangay. ug SK Chairpersons sa PCM SarGen.
Naa sab si Milka Romero nga mihulip sa iyang amahan nga si Cong. Mikee Romero isip unang nominado ug kanhi Manila Muslim Affairs Director Shey Sakaluran Mohammad isip ikatulo nga nominee sa partido.
Adunay usab makalingaw nga mga kalihokan sama sa raffle draw. Nagkadaiyang premyo ang gipang-apud-apod, apil ang oven toaster, electric kettle, electric fan, 50 ka buok 5kg nga bugas, ug usa ka brand new nga motorsiklo isip grand prize.
Ang partido nagpasiugda sa importansya sa tingog sa matag Pilipino ug sa ilang mga adbokasiya nga magpadayon sa pagsuporta sa batakang panginahanglan sa nasud.
Ang 1Pacman Partylist magpadayon sa pagpalapad sa ilang mga programa sa Luzon, Visayas ug Mindanao, nga nagtumong sa paghatag ug mas lapad nga benepisyo ug kahigayonan sa matag Pilipino.