Mangipatungpal ti gobierno probinsial babaen ti Metro Ilocos Norte Council ti “Pantawid Pasada Program.
Segun ken ni Atty. Nikki Pilar, mangidadaulo ti MINC, ditoy a maipaayan ti health insurance ken fuel subsidies ti nasursurok ngem sangapulo ket walo ribu a tricycle ken jeepney ditoy probinsia.
Imbatadna a karaman iti “Pantawid Pasada Program” ti pannakaibunong ti MINC card a mabalin a mausar iti uneg ti maysa a tawen.
Inlawlawagna a dagiti addaan ti card ket maipaayan ti health ken medical insurance pakairamanan ti gas voucher a kas iti inkari ni Gob. Matthew Marcos Manotoc bayat ti naisayangkat a pannakitaripnong ti MINC kadagiti drivers ken operators itay kallabes.
Malaksid iti daytoy, maikkan dagiti drivers ti walo agingga ti sangapulo a diskwento iti gatangenda nga agas kadagiti drug stores a makibinbinnulig iti MINC.
Impalgakna a napanunutanda ti nasao a programa gapu iti pannakakita ti gobernador iti risgo a sangsangwen dagiti driver iti inaldaw a panagpasada da.
Inbunannagna a nailatang ti duapulo a milyon a pisos para iti nasao a programa a mamindua a daras a maibunong iti uneg ti maysa a tawen.
Innayonna a manamnama a maibunong ti MINC cards iti masungad a bulan ti Mayo wenno Hunyo.
(Rodrigo Sadian, RPN DZRL Batac OIC)
(Source: Provincial Government of Ilocos Norte)