CAGAYAN DE ORO CITY- Moabot sa 130 ka mga negosyo sa Northern Mindanao ang permanente na nga nanira sa ilang operasyon base sa report sa National Economic Development Authority niadtong Enero 18, 2021. Matud pa ni NEDA- Northern Mindanao Assistant Director Leonila Cajarte nga sa maong gidaghanon sa nanirang Establisemento, 1,632 ka mga trabahante ang nanira ug sa 130 ka mga negosyo, 87% niini ang ania dinhi sa syudad sa Cagayan de Oro nga adunay 973 ka mga trabahante ang apektado.
Sa pikas bahin, gikataho nga adunay temporaryong nagsira nga moabot sa 1,458 ka mga establisemento nga nakaapektar sa 32,534 ka mga empleyado. Ug sa maong gidaghanon, 729 ang nagagikan sa Cagayan de Oro nga adunay 16,000 ka mga trabahante apektado. Kini tanan nga sitwasyon nagsumikad sa COVID-19 Pandemic, matud ni Cajarte.
Sa gibutyag sa Assistant Regional Director sa NEDA-10 nga adunay projection nga 4.5 to 10.5% nga pag-decline sa terms of gross sa Regional Domestic Product in Northern Mindanao sa 2020. Hinuon, matud niya ilang girecognize ang kalambigitan sa private sector isip aktibong member sa recovery cluster sa rehiyon. (Gin B. Serohijos/ NEDA 10)