Gipirmahan kagahapong hapon, Agusto 22, 2024, ang usa ka kasabotan alang sa pagtanom og 10 milyones ka mga punoan sa kahoy aron pagpahiuli sa Central Cebu Protected Landscape.
Ang kasabotan tali sa Aboitiz Group, Cebu Provincial Government, dakbayan sa Sugbo, ug sa dakbayan sa Talisay, gipirmihan atol sa tigom sa Cebu Investment & Tourism Forum nga gipasiugdahan sa Kapitolyo ug sa Mandaue Chamber of Commerce and Industry sa Bai Hotel, dakbayan sa Mandaue.
Si Acting Mayor Raymond Alvin Garcia maoy nipirma sa kasabotan alang sa dakbayan sa Sugbo, si Gov. Gwen Garcia sa Probinsiya sa Sugbo, Bise Mayor Richard Francis Aznar sa dakbayan sa Talisay, ug si Sabin Aboitiz, chairman sa board of trustees sa Aboitiz Foundation Inc, ang sa Aboitiz Group.
Sa iyang pagpamulong kabahin sa kalihokan, niingon si Acting Mayor Garcia ang hiniusang panagtigom karong hapon nagpakita sa lig-ong pagdumala sa liderato sa iyang iyaan nga mao ang gobernadora.
Gipahimuslan nalang usab niya ang kahigayonan sa pagbaligya sa siyudad sa mga bisita nga nitambong sa kalihokan pinaagi sa pag-awhag kanila nga mobubo og puhonan sa dakbayan sa Sugbo bisan og ipaagi sa Public Private Partnership (PPP).
Ang PPP napamatud-an na sa siyudad tungod kay duna nay mga dagkong magpapatigayon nga namuhonan dinhi sa siyudad pinaagi sa PPP, nga walay bisan usa ka dako nga kwarta nga napagawas ang siyudad nakatabang og dako sa padayong paglambo karon sa ekonomiya sa dakbayan.
Matud niya, mahimong mangimbitar ang mga nanambong sa kalihokan sa ilang mga kaila nga mobubo og puhonan dinhi sa dakbayan.
Gihimong sanglitanan ni Acting Mayor Garcia ang Citi De Mare sa Filinvest diha sa South Road Properties (SRP), ang Cebu Cordova Link Expressway (CCLEX), NuStar Hotel and Casino, ug ang Carbon Market Re-development Project.
Matud ni Acting Mayor Garcia, daghan pa kaayong bakante nga luna sa SRP nga mahimong ipaagi sa PPP. (Renante Socia Lada)
(Source: Cebu City PIO)