Aprobado na sa Sangguniang Panlalawigan ang dungag pondo nga Dyes punto Singko Milyones ka pesos (₱ 10.5M) alang sa pito (7) ka munisipyo sa probinsya sa Sarangani. Sa nahitabo nga special session niaging adlaw nga Biyernes nga gipatawag ni Governor Steve Chiongbian Solon, paspas kining na-aprobahan sa tanang board member sa pagdumala ni Vice Governor Elmer De Peralta.
Segun ni Board Member Joseph Calanao, ang chairman sa SP Committee on Finance, bahinon ang maong pondo sa matag lungsod sa Sarangani, ₱ 1.5 Milyon ka pesos kada munisipyo subay sa nasabutan nila Governor Solon ug sa pito ka mayor.
Dugang pondo kini para sa pagpalig-on sa contact tracing system sa matag munisipyo ug ang nagpadayon usab nga antigen ug antibody testing sa mga person of interest ug may sintomas sa Coronavirus, apil na ang padayong pag-angkon og mga PPE suit sa mga frontliner.
Sa gikaingon na ni Vaccine Czar Secretary Carlito Galvez Jr., bulan pa sa Mayo sunod tuig gibana-banaan nga masugdan ang pagbakuna sa publiko sa Pilipinas. Pwede pud matud pa masugdan ang maong pagbakuna sa katapusan na sa tuig 2021 kung adunay mga kakulian.
Sa record sa DOH bulletin kagabii, Nobyembre 8, lagpas usa ka gatos na ang nangamatay entiro Rehiyon Dose nga konektado sa COVID-19. Nikabat sa 101 ka mga indibidwal ang nahunusan sa kinabuhi sa Region 12. Trayntay kwatro (34) kabuok gikan sa Gensan, baynte singko (25) taga-Cotabato City, dise sais (16) ka tao gikan sa South Cotabato, napulo (10) sa North Cotabato ug tag-walo (8) gikan sa Sarangani Province ug Sultan Kudarat.
Sa talaan sa Sarangani Provincial Health Office Nobyembre 8 gihapon nga datus, ang active cases sa probinsya sa Sarangani niabot na sa setenta (70) ka mga tao. Nisaka ang munisipyo sa Glan anaa na sila karon sa kwarentay uno (41) ka active cases, Maasim onse (11), Alabel walo (8), Malapatan upat (4), Malungon tulo (3), Kiamba duha (2) ug Maitum usa (1). Nindot ang gipakita nga pag-ubos sa ihap sa Maasim tungod niaging mga semana anaa pa sila sa kwarenta kapin.
Sa bag-ong pamahayag ni Governor Solon, gibutyag niini nga sama sa testimonya ni Mayor Jun Sumbo, ngil-ngig ang Coronavirus. Padayong nanawagan si Governor Solon kauban sila Senador Manny ug Congressman Ruel Pacquiao nga dili magkumpyansa ang katawhang Sarangan.
Disiplina matud pa ang kelangan ug batasanon ang pagtuman sa personal safety protocol aron nga bisan unsa pa mang balatian nga makatakod, dili lang Coronavirus, andam pirme ang kaugalingon. Kung mahimo na nga kinaiya ang pagsuot og face mask ug face shield, pag-iwas sa panagtapok sa tao ug paghinlo sa lawas, dili na makaingon pa nga mabag-uhan sa mga gipatuman nga patakaran.
Lahi-lahi ang sintomas nga gagawas kung anaa sa lawas ang Coronavirus. May hilanat, ubo, sip-on, sakit sa ulo, pamuypoy sa lawas ug mga tiil, diarrhea, adunay dili makalasa sa gipangkaon. Naa gani dili na makatimaho bisan alcohol pay ipa-simhot. Angay nga magpasalamat sa Ginoo kung walay sintomas nga gibati, sila ang ginatawag nga mga asymptomatic patient. (Provincial Information Office – Sarangani)
