Un persona quien ta enfrenta el asunto de illegal recruitment ya aresta mga personajes del Criminal Investigation and Detection Group-9 (CIDG-9) y pulisiya local ayer tarde alli na Barangay Sta. Barbara, este ciudad.
El arestao suspechao ya conose como si Paksatul Anding, sincuenta’s seis anios el edad y residente de Purok 1, Barangay Mampang, este ciudad, asegun con el pulisiya local.
Asegun con el pulisiya cay si Anding tiene el pendiente orden de aresto estaba na jusgado por el crimen de Anti-Trafficking in Persons Act of 2003, Expanded Anti-Trafficking in Persons Act of 2012, y Migrant Workers and Overseas Filipino Act of 1995.
El jusgado ya recomenda el total piansa de tres sientos veinte mil de pesos por el mga asuntos que ta enfrenta si Anding para puede el obtene temporaryo libertad.
Si Anding ta esta bajo ahora na custodiya del CIDG-9. (April Boy Regino)