Maga personajes del Criminal Investigation and Detection Group (CIDG) ya aresta con sinco oficiales del Barangay Dulop, Dumingag, Zamboanga del Sur por el violacion del Codigo del Eleccion Heneral (Omnibus Election Code).
Si Coronel John Francis Encinareal, el hefe del CIDG aqui na Rehyon Nueve, ya nombra con el maga arestao oficiales como el siguientes: Ismael Españo, el barrio capitan del Dulop; Ronald Amamangpang, barangay kagawad; Edgar Sarajena, barangay kagawad; Juliana Maputi, barangay kagawad; y si Evelyn Amamangpang, el tesorera del Barangay Dulop.
Asegun con Encinareal cay con el sinco oficiales ya aresta maga alas dies y media del Huwebes aga por medio sirvir contra canila un orden de aresto desde’l tribunal del municipio de Molave, Zamboanga del Sur.
Asegun con Encinareal cay el culpa del sinco oficiales amo cay ya viola sila con el Codigo de Eleccion Heneral por medio de comprar voto durante el eleccion local y nacional del Mayo nueve, este año.
El tribunal del Molave que ya ase sale el orden del Agosto deci-nueve, este año, ta manda paga piansa de treynta’y seis mil pesos cada uno del dos asuntos que ta enfrenta cada uno de del sinco oficiales. (Bong Garcia, Jr., photo courtesy of Criminal Investigation and Detection Group IX)