DAVAO CITY- Misaka na sa upat ang kompermadong namatay samtang 18 usab ang nangaangol sa nahitabong panagbangga sa Mindanao Star ingon man Wing Van sa may Binugao Toril niadtong Martes.
Sumala pa ni Lieutenant Colonel Jed Clamor ang hepe sa Toril Police Precinct nga ang nadugang sa listahan nga nangamatay mao ang mga pasahero sa Mindanao Star nga naglingkod sa likod nga bahin sa Driver sa Bus. Ang talaan sa nangamatay naglangkob nila ni Judy Tepacia Mejares, Theresa Gonzales, ug magti-ayon nga sila Julieta Tulin ug Rodrigo Tulin.
Pinasubay sa inisyal nga imbistigasyon sa Traffic Section sa Toril police Precinct nasayran nga managsama nga paspas ug dagan ang duha ka mga sakyanan. Wala matud pa makabig sa duha ka mga driver ang ilang gipangmanehong sakyanan hinungdan nga nagsungag ang matag kilid niini.
Sa kakusog sa impak sa disgrasya, natanggal ang walang bahin sa Wing Van samtang wala na usab mahitsura ang kilid nga bahin sa Mindanao star. Nasayran nga gikan sa Cotabato City ang Mindanao Star samtang sakay ang 40 ka mga pasahero ug paingon kini sa Dakbayan sa Davao samtang ang Wing Van paingon usab sa Davao del Sur.
Ning kasamtangan, giandam na sa kapolisan ang pagpasang-at ug kaso batuk sa duha ka mga responsabling Driver samtang ang mga nangaangol ug nangamatay giatiman na usab sa duha ka mga kompanya nga nalambigit sa disgrasya.