El “Zamboanga City Water District (ZCWD)” hay implementa efectivamente na Lunes esquema de racion de agua para solve con el problema de escasez de agua na costa oeste y cuantos lugar na centro del ciudad.
El mga afectao concesionarios na racion de agua amo aquellos que ta servi el planta de tratamiento de agua del Prime Water Infrastructure Corporation (PWIC), el bulk water supplier del ZCWD.
Asegun con el ZCWD, el implementacion del esquema de racion de agua es una manera para solve con el problema de menos produccion de agua na planta de tratamiento por causa del secas na lugar.
El nivel de produccion del PWIC ya abaja dentro de 10 por ciento desde’l normal produccion de 45 millon litros cada dia.
Asegun con el ZCWD, el intermitentes aguacero nohay ase subi con el agua na nivel operacion normal del PWIC.
El esquema de racion de agua intendido para propiorcionar auga na mga lugar na costa oeste desde 11 para 12 horas y 10 para 11 horas cada dia na centro parte de ciudad.
Sin embargo, asegun con el ZCWD ay tene cambio na hora del esquema de racion depende na volumen del agua.
El ZCWD ta conseja con el mga afectao concesionarios para guarda agua ng mga limpio y tapao contenedores.
(B. Garcia)
