El “Zamboanga City Traffic Operations Management (ZCTOM) ya aprova el conducida del un semana ensayo para el saca y anda o el “pick and go” esquema de trafico aqui na ciudad.
Asegun con el oficina de informacion publico del “City Hall” del Sabado, el ensayo ay conduci desde Marso 20 hasta 27 base na un resolucion que ya aprova durante el junta del ZCTOM del Viernes pendiente el dalida del un orden ejecutivo el Alcalde John Dalipe.
El esquema del saca y anda ay inclui lang con el mga jeep de pasajeros con franquisa que ta viaja na Ruta B del “Zamboanga West Transport Service Cooperative (ZaWesTCo), Marena Transport Corporation y Talon-Talon Transport Corporation”.
El periodo del ensayo ay dale oportunidad con el mga enforsador del leyes trafico y concierne autoridades para mira y evalua el actual andansa del mga pasajeros y trafico de vehiculo na tal tiempo na Ruta B antes que permanente ay implementa con el esquema de trafico.
Con el ensayo nohay porsigui implementa por cuantos semana ya ahora por causa del mga asutos y conciernes que necesita clarifica. (B. Garcia)