El mga autoridad ya aresta dos personas y ya confisca P102,000 valor de droga ilegal y un armas de fuego sin licensia na un operacion contra droga na ciudad de Zamboanga, asegun con el policia del Martes.
El Zamboanga City Police Office (ZCPO) ya identifica con el dos arestao suspechao como canda alias Rasid y si alias Al, ambos mga residentes del Barangay Arena Blanco, ciudad de Zamboanga.
Asegun con el ZCPO, canda Rasid y Al ya aresta na un operacion de compra busto mga ala 1:36 del Lunes aga na Paseo de Lapu-Lapu, Barangay Arena Blanco, ciudad de Zamboanga.
Asegun con el policia, ya confisca na posesion de canda Rasid y Al 15 gramos de suspechao shabu que tiene el valor de P102,000, dinero de compra busto, y un calibre .38 revolver con sinco bala.
Asegun con el ZCPO, con el dos arestao suspechao ya pone bajo’l custodia del Zamboanga City Police Station 6 en preparacion para el plantada del caso contra canila por violacion del Ley Integral de Drogas Peligrosas de 2002.
El ZCPO, en colaboracion con el Philippine Drug Enforcement Agency, hay continua demostra el inquebrantable dedicacion para eradica droga ilegal y armas sin licensia na comunidad. (B. Garcia)