El Western Mindanao Command (Westmincom) ya conduci ceremonias del cambio de mando y retiro en honor con Tiniente General William Gonzales del Miercoles na Campo Navarro, Calarian, ciudad de Zamboanga.
Durante el ceremonia del cambio de mando, si Gonzales oficialmente ya entrega si puesto con Major General Antonio Nafarrete, el comandante de 6th Infantry Division, quien ya asumi el papel como el interino comandante del Westmincom.
El ceremonia del cambio de mando ya sigui despues el ceremonia de retiro donde ya regala con Gonzales el Plaque de Reconocimiento, reconociendo su buen liderato na fuersa armada que enciende emulacion entre su colega y subordinados.
Ya regala tamen Plaque de Apreciacion con Señora Citesa Divina Gonzales, el esposa de William, en reconocimiento por su amor inquebrantable y suporta con su esposo.
Na su mensaje de despidida, si Gonzales graciosamente ya reconoce con el mga gentes quien innegable ya hace su liderato en uno notable.
Ya rendi gratitud si Gonzales con mga oficiales y personajes del Westmincom quien ya habla le el virdad fuerza del institucion y contodo honor ele ya servi con el grupo exepcional.
Si General Romeo Brawner, el comandante de fuerza armada del Filipinas y quien ya encabesa con el ceremonia, ya habla cay nohay le man camali designa con Gonzales quien ya establisa un buen legacia como el aca-18 comandante del Westmincom.
Mientras tanto, si Nafarrete ya expresa su gratitud por el confiansa ya dale conele para servi como el interino comandante del Westmincom. (B. Garcia)