El gobierno local ya dale premio de P300,000 con el policia por el aresto del dos suspechao na reciente incidente de tiroteo y reciente confiscacion de droga ilegal na ciudad de Zamboanga.
El Alcalde John Dalipe personalmente ya dale el premio del Miercoles con el mga jefes del Zamboanga City Police Station 1 (ZCPS1), ZCPS9, y del City Drug Enforcement Unit (CDEU) mientras ya comenda le canila por el de ila gran accomplicimientos.
El mga jefes del dos estaciones del policia y CDEU ya recivi P100,000 premio cada uno.
Si Dalipe ya habla, su administracion ta esta constante na dedicacion para suporta con el policia na de ila guerra contra todo’l forma de criminalidad, incluido el comercio de droga ilegal.
Durante el entrego del premio del Miercoles, si Police Colonel Kimberly Molitas, el director del policia local, hunto con Dalipe ya presenta con ambos suspechao de tiroteo durante el conferecnia de prenza na cuatro de conferencia del Zamboanga City Police Office (ZCPO).
Uno del mga suspechao, de quien mga indentificacion nohay hace de publico, amo el alegaomente echor na incidente de tiroteo del Marso 15, 2024 na Sitio Log Pond, Barangay Tictapul, ciudad de Zamboanga. Conele ya aresta el mga operativas del ZCPS1.
El otro suspechao, quien alegaomente el responsable na na incidente de tiroteo del Abril 9, 2024 Calle Sto. Niño, Zone 7, Barangay Ayala, ciudad de Zamboanga. Conele ya aresta mga oeprativas del ZCPS9.
Si Molitas ya atribui con el aresto de mga suspechao na continuando y sin descanso suporta del gobierno del ciudad bajo liderato de Dalipe con el policia del ciudad. (B. Garcia)