El Alcalde John Dalipe ya ordena con el City Social Welfare and Development Office (CSWDO) para ase de fronto del evaluacion y “profiling” del mga victima de incendio na Barangay Calarian en este ciudad.
Na mismo tiempo, si Dalipe ya ordena con Socorro Rojas, el hefe del CSWDO, para asegura cay todo el mga afectao familia ay recivi ayuda desde’l govierno local.
El CSWDO ya dale ya inicial ayuda con mga afectao familiares como comida, agua y otros pa mga necesidades.
Total de 40 familia el ya perde casa na un incendio que ya ocuri ayer aga (Martes aga) na Camacop village, Barangay Calarian na costa oeste de este ciudad.
El mga afectao familiares temporalmente na esta na “covered court” del Flamingo.
Asegun con el Zamboanga City Fire District (ZCFD) total de 40 casa el ya man uput na incendio que ya principia mga alas 4:20 del Martes aga na Camacop village, Barangay Calarian.
El fuego ya principia na casa de Rogelio Cañete y despues ya man calayat para na otro mga casa todo hacido de palo.
El ZCFD ya habla cay el estimao valor del propiedad ya quema ya alcansa mas o menos P1.2 millon. (B. Garcia) (Photo Courtesy of ZCFD)
