GENERAL SANTOS CITY – GIKATAKDANG manumpa na ang mga nidaug nga mga kandidato sa milabay nga Barangay and SK Elections 2023 sa General Santos City. Sa kumpermasyon sa usa sa gipalad sa piniliay nga si Kagawad Elect Editha Cabsaban sa Barangay Katangawan, gipahibalo sila nga Nobyembre 15e alas tres sa hapon ang ilang schedule sa pagpanumpa, ipahigayon kini sa usa ka hotel sa syudad.
Sumala kay Cabsaban nga sa karon pa lang nagapasalamat na siya sa tanang nisuporta kaniya mao nga nahimo siya nga number 1 kagawad sa Katangawan, wala daw siyay laing puhunan kondili ang iyang pagka mananabang kung asa dili na maihap ang iyang napaanak sa ilang barangay. Nahimo daw siya nga politiko gumikan usab sa sugyot kaniadto sa mga tawo ug daku usab ang iyang pasalamat sa nipanaw na nga kanhi kongresista sa South Cotabato nga si Lu Antonino nga naka impluwensya usab kaniya sa ginatawag nga serbisyo publiko. Mensahe usab sa napildi nga konsehal nga si Barangay Bula Kagawad Antonio Talle sa mga nakadaug nga unta mosipot gayud kanunay sa barangay unya buhaton ang ilang mga trabaho. (Jun Abelo)