El mga autoridad ya cogi na acto con un persona ta vende droga ilegal y ya confisca shabu que tiene el valor de P340,000 na provincia de Tawi-Tawi, asegun con el policia del Viernes.
El Police Regional Office-Bangsamoro Autonomous Region (PRO-BAR) nohay nombra con el arestao ventero de droga ilegal puera lang de habla’r ya cogi conele na acto ta vende shabu na Barangay Simandagit, Bongao, el capital del Tawi-Tawi del Miercoles.
Asegun con el PRO-BAR, con el suspechao ya aresta despues que el mga operativas del policia ya responde con el reclamo del un concierne residente acerca el actividad de droga ilegal na Barangay Simandagit, Bongao.
Asegun con el policia, ya recubri na posesion del arestao suspechao mas o menos 50 gramos de shabu enpaquetao na dos plastico sobrecitos que tiene el valor de P340,000.
Con el arestao suspechao y el mga evidencia ya lleva na quartel del policia na municipio del Bongao para el documentacion y propio disposicion.
Asegun con el policia, hay planta asunto contra con el arestao suspechao por violacion del “Comprehensive Dangerous Drugs Act of 2002”.
Mientras tanto, si Police Brigadier General Prexy Tanggawohn, el interino director del PRO BAR, ya alaba con el mga operativas por el de ila rapido respondida na concierne del mga residentes que ya resulta na aresto del suspechao.
Si Tanggawohn ya reconoce con el colaboracion y coordinacion entre el mga autoridad y comunidad que ya contribui na ejecucion exitosa del operacion na para enforsada del ley. (B. Garcia)