El Oficina Comunitaria de Medio Ambiente y Recurcos Naturales na Ramon Magsaysay, Zamboanga del Sur, que ta encabesa si Dionisio Rago ya larga 52 anak del “Olive Ridley” turtuga na canto’y aplaya en aquel provincia.
Asegun con el oficina regional de Departamento de Medio Ambiente y Recursos Naturales o DENR del Viernes, con el mga anak de turtuga ya larga na canto’y aplaya del Barangay Lower Bayao, Tukuran, Zamboanga del Sur.
Asegun con el DENR, con el mga anak de turtuga ya descubri si Richard Maganoy, un empleyado de un resort, que ya abuya na arena na canto’y aplaya del Lower Bayao, Tukuran.
Si Maganoy ya informa con Jessie Wison, un miembro del “Bantay Dagat”, quien ya ayuda conele reloca con el mga anak de turtuga na un protejido lugar.
El mga personajes del CENRO-Ramon Magsaysay, despues de recivi’r el informacion, ya enderesa na Barangay Lower Bayao, Tukuran y ya larga con el mga anak de turtuga na aplaya.
Asegun con el DENR, el turtuga Olive Ridley clasificao como vulnerable y bajo el peligro de extinction. (B. Garcia)