Un vendedor de pescao el ya aresta mga autoridad na un campaña contra droga ilegal aqui na ciudad de Zamboanga, asegun con el policia local del Sabado.
El policia local ya nombra con el arestao suspechao como si Bryan Adjuran, 24 años el edad, y residente del Paseo de Manggal, Barangay Baliwasan, en este ciudad.
Asegun con el policia, con Adjuran ya aresta na un “buy-bust operation” mga alas 9:01 del Viernes denoche na Sitio Asinan, Barangay Kasanyangan, en este ciudad.
El nombre de Adjuran incluido na “watchlist” del policia local relatao na campaña contra droga ilegal.
Asegun con el policia, ya puede recubri na posesion del Adjuran cuatro gramos de suspechao shabu que tiene el valor de P27,200, un portamoneda ta contene P30, y P200 markao sen que ta usa na buy-bust operation.
El arestao suspechao detenido na Zamboanga City Police Station 11 en preparacion para el plantada del asunto por violacion del Comprehensive Dangerous Drugs Act of 2002. (B. Garcia)