Un individual listao como un persona mas buscada el ya aresta el mga autoridad na un operacion de aplicacion de ley na provincia del Sur Cotabato, asegun con el Area Police Command-Western Mindanao (APC-WM) del Miercoles.
El APC-WM ya nombra con el arestao persona mas buscada como si John Mark, 24 años el edad.
Asegun con el APC-WM, con Mark ya aresta na un operacion de aplicacion de ley por medio de servi’r un orden de aresto del otro semana na Purok 1, Barangay Kinilis, Polomolok, Sur Cotabato.
Asegun con el APC-WM, si Mark tiene pendiente orden de aresto por el crimen de estatutorio abuso carnal sin recomendao piansa que ya dale el un corte de Polomolok, Sur Cotabato.
Asegun con el APC-WM, si Mark listao como el numero tres persona mas buscada na municipio de Polomolok, numero nueve na provincia del Sur Cotabato, y numero 10 na Region 12.
Con Mark ya pone bajo’l custodia del policia del municipio de Polomolok para el propio disposicion y documentacion.
“El exitoso aresto del suspechao un prueba del de amon dedicacion y determinacion del de amon operativas para dale justicia con el mga victima,” Si Police Brigadier General Percival Augustus Placer, el director del policia na Region 12, ya habla na un declaracion.
“Ta envia este un claro mensaje para con aquellos quien ta servi de amenaso con el paz y seguridad de de aton region,” si Placer ya omenta. (B. Garcia)