El mga autoridad ya aresta con un negociante clasificao como un “watchlisted” y ya confisca droga y pusil durante un campaña contra droga ilegal aqui na ciudad, asegun con el policia local.
El policia local ya nombra con el arestao negociante como si Shebar Jailani, 36 años el edad y residente del Purok 3, Barangay Sangali, en este ciudad.
Asegun con el policia, con Jailani ya aresta na un “buy-bust operation” mga alas 12:34 del Lunes aga na Zone 3, Barangay Talabaan, en este ciudad.
El policia ya habla, ya puede recubri na posesion del arestao negociante 6.5 gramos de suspechao shabu enpaquetao na siete diutay supot-supot de plastic que tiene el valor de P44,200, un calibre .45 pistol con seis bala, un motorsiclo, P1,000 “boodle money”, un portamoneda, un bolsa tactica, y P200 markao dinero.
Con el arestao suspechao ya pone bajo’l custodia del Zamboanga City Pollice Station 4 en preparacion para el plantada del asunto por violacion del leyes contra droga ilegal. (B. Garcia)