El mga personajes del Guardia Costera del Filipinas o Philippine Coast Guard (PCG) ya salva con un fescador de quien motorbanca ya queda malo na mar del provincia de Basilan, asegun con el PCG del Martes.
El PCG ya nombra con el salvao perscador como si Resal Edgar, 23 años el edad.
El PCG ya habla, con Edgar ya salva mga alas 10:30 del Lunes aga amediante del Islas de Lampinigan y Panigayan, Malamawi, ciudad de Isabela, el capital del provincia de Basilan.
Si Edgar ya sale na su casa del Domingo tarde para anda pesca na vicinidad del Isla de Panigayan, pero nohay le puede bolbe.
Despues de recivir informacion, enseguidas el mga personajes del Coast Guard Station (CGS)-Isabela y Coast Guard Sub-Station (CGSS)-Malamawi ya conduci operacion de enbuscada y rescate usando de ila jungkong y ya encontra sila con Edgar muntao na su motorbanca ta man anud-anud amediante del islas de Lampinigan y Panigayan mga alas 10:30 de Lunes aga.
Asegun con Edgar, ya queda malo el makina del su motorbanca despues que tiene conele ya ase bangga un desconosido motorbanca mientras ta pesca ele del Domingo denoche.
Con Edgar enseguidas ya lleba na CGSS-Malamawi para el evaluacion del su salud y verificacion de daños del su motorbanca. (B. Garcia, photo courtesy of Coast Guard Station Isabela)