Un joven myembro del grupo Abu Sayyaf ya rindi con maga autoridad del Sabado alla na provincial de Sulu, asegun con el fuersa militar.
El militar ya nombra lang con el Abu Sayyaf quien ya rindi como un tal Abu Bas, veinte tres años el edad y residente del Barangay Lubok-Lubok, Panglima Estino, Sulu.
Asegun cay si Bas ya rindi con Tiniente Coronel Benito Ramos, Hijo, comandante del 2nd Special Forces Battalion.
Con Bas ya presenta con Brigadier General Eugenio Boquio, comandante del 1101st Infantry Brigade y Alkalde Morsid Estino na municipio del Panglima Estino, Sulu.
Si Bas ya entrega un M-16 riple cuando ya rindi ele. Si Bas uno del maga sigidores de Jaber Susukan, uno del maga lideres del Abu Sayyaf na provincia de Sulu.
Si Bas ya admiti cay ya decidi le rindi por causa cansao ya ele cambia que cambia lugar para seconde con el tropa del fuersa militar.
Asegun con Major General Ignatius Patrimonio, comandante del 11th Infantry Division, cay ay recomenda le para incluwi con Bas na Localized Social Integration Program por medio del Municipal Task Force to End Local Armed Conflict del Panglima Estino. (Bong Garcia, Jr., photo courtesy of 11th Infantry Battalion)