Ya aresta maga autoridad con sinco tripulantes de un jungkong que ya puede sila cuji ta carga dos punto nueve milyones de pesos cantidad de contrabando na provincia del Zamboanga Sibugay.
Asegun con Coronel Richard Verceles, el operations chief del Area Police Command-Western Mindanao, cay con el jungkong que ta maneja si Abdul Garam, cuarenta años el edad, ya cuji maga alas onse treynta’y ocho del Lunes denoche myentras ta aproxima este na canto’y aplaya na Sitio Garing-Garing, Barangay Tiayon, Ipil, Zamboanga Sibugay.
Asegun con Verceles cay con el maga tripulante de Garam ya conose como canda Cammar Hassan, cuarenta, Marvin Dambong, veinte cuatro, y Mohammad Alih, veinte seis años el edad y maga residentes del Barangay Bus-Bus, Jolo, Sulu. Con el otro tripulante ya conose como si Abbon Anta, veinte cuatro años y residente del isla de Malamawi, Isabela City, Basilan.
Asegun con Verceles con el maga contrabando ya puede cuji na un intelligence-driven operation contra smuggling que ya ase el maga pulis de Ipil, Provincial Intelligence Unit, y del 2nd Zamboanga Sibugay Provincial Mobile Force Company.
Ya habla si Verceles cay maga operativas ya confisca dosientos cuatro cahon de diferente clase de cigarillo que tiene el cantidad de dos punto nueve milyon de pesos.
Asegun con Verceles cay el maga smuggled cigarillo estaba na provincia de Sulu. (Bong Garcia, Jr., photo courtesy of Area Police Command-Western Mindanao)