Un myembro de un notorioso grupo de criminal el ya muri na tirahan contra con maga personajes del pulisiya alla na provincia del Lanao del Sur.
El Lanao del Sur Provincial Police Office ya nombra con el muerto myembro del mal elementos de sociedad como si Jack Macaraya, un myembro del notorioso Macaraya Criminal Group.
Asegun con el pulisiya cay ya man tirahan el maga pulis y si Macaraya despues que ya imbisti el suspechao cuando ya sirvi con ele orden de aresto del maga pulis del Lunes alla na Barangay Tuka-Kialdan na municipio de Marantao, Lanao del Sur.
Con Mcaraya, quien ya sufri irida de bala, enseguidas ya lleba na hospital na ciudad de Marawi pero ya declara muerto el doctor quien ya attended con el suspechao.
Asegun con el pulisiya cay si Macaraya tiene pendiente orden de aresto de robo y homicidio estaba na jusgado de ciudad de Marawi del hunyo trese este anio.
El maga pulis ya recubri con un cuarenta’y sinco pistola, el armas de Macaraya, na lugar onde sila ya man tirahan.
Asegun con el pulisiya cay el Macaraya Criminal Group envuelto na maga incidente de matansa y robo na municipio de Marantao, Lanao del Sur. (Bong Garcia)