Ya impone cambio na liderato del oficina de personajes el mando del fuersa naval na Western Mindanao del Lunes.
Asegun con el portavoz del fuersa naval del Western Mindanao, si Tiniente Chester Ross Cabaltera, cay si Commander Ronald Berja, ya entrega su oficina y obligacion con su relevo, si Commander Annalyn Glarian, el hefe del centro de operacion del fuersa naval.
Si Berja ya recivi un honor militar y Plaque de Merito por su maga contribucion na mando del fuersa naval del Weste Mindanao myentras si Glarian ya recivi un honor military por su valuable contribucion como el hefe del centro de operacion del fuersa naval.
El fuersa naval ya designa tamen con Tiniente Melrose Rabe como el relevo de Glarian na oficina del centro de operacion del fuersa naval.
El cambio del liderato na maga mencionao oficina ya ase del Lunes na Tolentino Hall del Naval Station Romulo Espaldon, que ta sirvi el quartel del fuersa naval del Western Mindanao aqui na ciudad de Zamboanga.
El ceremonya del cambio de liderato ya encabesa si capitan Alex Gianan, el Chief of Staff del fuersa naval del Western Mindanao. (Bong Garcia)