Un miembro de un grupo de mal elementos de sociedad el ya muri na tirahan contra con maga soldao del 34th Infantry Battalion (34IB) na uno del mga barrios na Special Geographic Area (SGA) del Bangsamoro Autonomous Region in Muslim Mindanao (BARMM), asegun con el militar del Jueves.
Asegun con el 6th Infantry Division (6ID), el tirahan ya ocuri del Lunes na Barangay Mudseng, na nuevo creao municipio de Kadayangan na SGA del BARMM.
Asegun con el 6ID, por causa del tirahan, el militar ya puede previni un planiao atace que hay conduci el grupo del mga armao personas na Barangay Mudseng.
Si Tiniente Coronel Edgardo Batinay, el comandante del 34IB, ya habla cay ya conduci sila patrulla de seguridad despues de recivir un informacion sobre el plano del armao grupo de mal elementos de sociedad para ataca con el Barangay Mudseng, Kadayangan.
Si Batinay ya habla, ya ocuri el tirahan despues que derepente ya tira canila el mga armao personas mientras ta conduci sila patrulla de seguridad.
El tirahan ya alcansa 20 minutos que ya resulta na muerte del un miembro del grupo del mal elementos del sociedad.
Asegun con Batinay, el mga soldao ya recubri un calibre .50 rifle de francotirador, o sniper, un rifle M-14, tres granada de fusil, mga bala y clip que na custodia ahora del policia.
Asegun con Batinay, ta investiga el policia con el incidente mientras el mga autoridad enseguidas ya coordina com el mga oficiales del barangay para dale decente intierro con el dipunto.
Si Brigadier General Donald Gumiran, el commandante del 602nd Infantry Brigade ya alava con el tropas del 34IB por responder inmedietamente que ya previni con el mal plano del mga mal elementos del sociedad. (B. Garcia)