Un chufer de habal-habal listao como un individual de alto valor, o HVI, el ya aresta mientras P1.3 millones valor de droga ilegal el ya confisca el mga autoridad na un operacion contra droga na ciudad de Zamboanga, asegun con el policia del Jueves.
Ya confisca tamen el mga autoridad un calibre .45 pistol na posesion del uno del dos arestao suspechao, asegun conel policia.
El policia local ya identifica con el arestao HVI como si alias Estino, 38 años el edad y residente del Barangay Talon-Talon, y si alias Ital, 40, residente de Barangay Sta. Catalina, cudad de Zamboanga.
Asegun con el policia, con el dos suspechao ya aresta na un operacion de compra busto mga alas 11:31 del Martes denoche na Phase 4, Sitio Asinan, Barangay Kasanyangan, ciudad de Zamboanga.
El policia ya confisca na posesion de canda Estino y Ital mas or menos 200 gramos de suspechao shabu que tiene el valor de P1,360,000, y dinero de compra busto.
Asegun con el policia, con el calibre .45 pistola con tres bala ya confisca na posesion de Estino.
El policia ya habla, con Estino ya aresta ya previamente por el semehante culpa del Marso 15, 2019 y ya larga del Mayo 3, 2024.
Asegun con el policia, si Estino and Ital hay enfrenta el caso por violacion del Ley Integral de Drogas Peligrosas de 2002.
Si Estino hay enfrenta omento caso por ilegal posesion de armas de fuego, asegun con el policia. (B. Garcia)