El mga tropas del gobierno ya previni un bombardeo de carretera cuando ya recubri y dispone sila un dispositivo explosivo improvisado, o IED, na municipio de Datu Unsay, Maguindanao del Sulu, asegun con el militar del Lunes.
Si Tiniente Coronel Rowel Gavilanes, el comandante del 90th Infantry Battalion, ya habla con el IED ya recubri del Viernes na Barangay Iginagampong, Datu Unsay.
Asegun con Gavilanes, con el IED ya encontra na costao del pasada de hente el un residente, quien inmedietamente ya informa con mga soldao.
Si Gavilanes ya habla, su mga personajes hunto con el mga tropas del 32nd Explosive Ordnance Demolition enseguidad ya verifica el veracidad del informacion ya recivi sila.
Asegun con Gavilanes, el grupo de respuesta sin peligro ya recubri y dispone un conjunto de IED con un Rocket-Propelled Grenade como cargo principal con un granada como imprimacion y alarm clock de bateria como el triggering device.
Si Gavilanes ya expresa su gratitud con el informante, quien ya tene el corage para informa con el concierne autoridades, proteje desde peligro y daño con mga residentes na lugar.
Si Gavilanes nohay habla si quien el responsable na ponida del bomba pero el mga autoridad na lugar ya nota el clase de explosivo ta usa el grupo del Bangsamoro Islamic Freedom Fighters (BIFF).
Asegun con Gavilanes, hay continua sila fortalece el buen relacion con mga residentes para asegura el seguridad de todo.
Si Gavilanes ta apela con el publico para esta vigilante y coopera con mga autoridades para asegura el seguridad del comunidad. (B. Garcia)