Tres personas el ya muri na un incidente de tiroteo na ciudad de Zamboanga amediante el implementacion del prohibicion de llevada de armas na entero pais, asegun con el policia del Viernes.
El policia local ya identifica con el mga fatalidad como canda Troy Resurrecion, 24 años el edad; Jovert Marcos, 40; y, si Anthony James Resurreccion, 21. Todo’l mga victimas mga residentes del Barangay Talon-Talon.
Asegun con el policia, el incidente ya ocuri mga alas 2:30 del Viernes aga na Calle Falcatan, Barangay Tetuan, ciudad de Zamboanga.
Base na investigacion, el mga victimas muntao na un motorciclo de camino pa bolbida estaba man tomahan na un cervecerial o establicimiento de tomada, na Barangay Putik, cuando ya ataja canila el mga vehiculo, un color blanco y un color negro.
Asegun con el policia, con el mga victimas ya tira el un desconocido armao persona ta usa sombrero, chocolate camiseta, y pantalon quien ya abaja desde na blanco vehiculo.
Despues de tirar con el mga victimas, el mga suspechao ya escapa na lugar del crimen para na direccion del Calle Alfaro, Barangay Tetuan.
Asegun con el policia, dos del tres victimas, canda Troy Resurreccion y Jovert Marcos ya muri na lugar del crimen y si Anthony James Resurreccion ya rebenta el resuello mientras bajo’l curada medical na hospital.
El policia ya sabe cay que ya bolbe el mga victimas, ya tene sila purpiahan con otro mga clientes del cerveceria na Barangay Putik.
El policia ta hace el exhaustivo invetigacion para identifica con el mga suspechao responsable na incidente de matansa.
Este incidente amo el aca-ocho que ya ocuri na ciudad de Zamboanga amediante del implementacion del prohibicion de llevada de armas de fuego na entero pais. (B. Garcia)