Tres myembros del grupo Abu Sayyaf ya rindi del Lunes tarde con maga autoridad alla na provincia de Sulu.
Si Coronel Richard Verceles, el operations chief del Area Police Command-Western Mindanao ya nombra canila tres como canda Mujir Jallah Aharadji, veinte nueve años el edad; Jurrim Alungan Hapas, sesenta’y uno; y si Ebin Habiba Hapas, sesenta años el edad.
Asegun con Verceles ya rindi sila maga ala una y media del Lunes tarde na quartel del pulisiya del provincia de Sulu na Barangay Asturias, Jolo, el cabisera de provincia.
Si Verceles ya habla cay el tres envuelto na serye de encuentro contra con maga tropa de govierno na Sulu.
Si Jurrim ya keda pa envuelto na kidnapping de veinte uno personas, incluwido dies turista desde Europa, del Abril veinte tres años dos mil alla na isla de Sipadan, Malaysia.
El rindida del tres myembros del grupo Abu Sayyaf ya facilita el combinao fuersa del pulisiya na Sulu, Criminal Investigation and Detection Group y Special Action Force. (B. Garcia, photo courtesy of Area Police Command- Western Mindanao)