Un trabajante de construccion y un viuda el ya aresta y valor de P446,760 suspechao shabu el ya confisca mga autoridad na un campaña contra droga ilegal aqui na ciudad de Zamboanga, asegun con el policia del Sabado.
Asegun con Police Colonel Alexander Lorenzo, el Zamboanga City Police Office (ZCPO) director, con el dos suspechao ya aresta na un “buy-bust operation” mga alas 12:27 del aga de este dia de Sabado na Barangay Sto. Niño, en este ciudad.
Si Lorenzo ya nombra lang con el arestao trabajante de construccion como un al Palattao, 43, y el viuda como un tal Elly, 40 años el edad, ambos mga residentes del Barangay Sto. Niño.
Asegun con Lorenzo, ya confisca na posesion del dos arestao suspechao seis pakete del suspechao shabu que tiene el pesades de 65.7 gramos con el valor de P446,760, un portamoneda, y P200 markao sen.
Con el dos arestao suspechao ya detene na carcel del quartel del ZCPO en preparacion para el plantada del asunto contra canila por violacion del “Comprehensive Dangerous Drugs Act of 2002”. (B. Garcia)