Un trabajante de un compania de pesca el ya muri na un incidente de tajo mientras con el suspechao ya puede aresta mga pulis na costa weste de este ciudad, asegun con el policia local del Sabado.
El policia local ya nombra lang con el victima como un tal Radzmer, 36, un trabajante de un compania de pesca na costa weste de este ciudad.
Con el suspechao ya nombra el policia local como un tal Rasul, un chufer de “habal-habal” que tiene el edad desde 35 hasta 40 años.
El incidente ya ocuri mga alas 9:16 del Viernes aga na Zone 1, Barangay Cawit na costa weste de este ciudad.
Base na investigacion, ta para si Radzmer apuera del compania onde le ta trabaja cuando ya llega si Rasul y derepente ya ataka con el victima con sanggut.
Ya sufri mucho irida de tajo el victima que ya causa su enseguidas muerte. Ya puede recrubri el mga con el sanggut na lugar del crimen.
Enseguidas ya escapa si Rasul, pero ya puede conele aresta mga alas 6:50 del Viernes denoche despues que ya ase con ele enbuscada el mga pulis con el suspechao.
Asegun con el policia, si Radzmer y Rasul ta tene confrontacion na Barangay Hall del Cawit del Octubre 14 por el reclamo de “physical injury” y ya tene sila areglo. (B. Garcia)