El mga tanque de agua del “City Disaster Risk Reduction and Management Office (CDRRMO)” despelgao na mga barrio para oferta agua con mga residentes amediante del fenomeno de El Niño.
El Alcalde John Dalipe ya ordena el despelgada del mga tanque de agua para ayuda alivia el miseria del mga residentes amediante el fenomeno de El Niño que ya causa con el “Zamboanga City Water District” para impone el esquema del racion de agua.
El mga barangay que ta servi el mga tanque de agua del CDRRMO ta inclui el Campo Islam, San Jose Gusu, Calarian, Sinunuc, Maasin, Cawit, Tulungatung, Arena Blanco, Mampang, Talon-Talon y Kasanyangan.
Asegun con Dalipe, el despelgada del mga tanque de agua na costa este y oeste del ciudad ta ase cada otro dia.
De mas temprano, el ZCWD ya impone 12 horas esquema de racion de agua cada dia y ya cambia para na cada otro dia principiando del otro semana cay ta continua abaja el nivel del agua na deposito por causa del largo tiempo de secas.
Si Dalipe ya apela con todo’l mga residentes para conserva agua y ayuda a uno y otro. (B. Garcia)