Un persona quien allegaomente responsable na un incidente de matansa el ya aresta el mga autoridad na un operacion contra droga ilegal na ciudad de Zamboanga, asegun con el policia local del Lunes.
El con el policia local ya nombra con el arestao suspechao como si Roscar Trumata, 49 años el edad y residente de Barangay Cabatangan, ciudad de Zamboanga.
Asegun con el policia, con Trumata ya aresta el mga personanes del Zamboanga City Police Station 7 (ZCPS7) bajo el supervision de Police Major Ramon Aquiatan, Jr., el jefe de ZCPS7, na un operacion de compra busto mga alas 12:51 del Domingo aga na Sitio Talungon, Barangay San Roque, ciudad de Zamboanga.
El policia ya habla, con Trumata ya aresta despues que ya vende le droga ilegal con un pulis, quien ya pretende como un comprador de droga.
Asegun con el policia, ya confisca na posesion de Trumata .47 gramos de suspechao shabu enpaquetao na tres termosellada transparente sobrecitos plastico que tiene el valor de P3,196, un calibre .9-millimetro pistola con clip y tres bala, y un P500 markao dinero.
Asegun con el policia local, el arestao suspechao alegaemente amo el quien ya likida con Randy Lada, 51 años el edad, un trabajante de fabrica del Julio 24 na Sitio Talungon, Barangay San Roque.
Si Lada ta maneja su bisicleta pa bolbida para na Barangay Cabatangan cuando ya tira con ele el suspechao.
Si Lada, quien ya sufri fatal irida, ya muri na mismo lugar del incidente. (B. Garcia)