Zamboanga: Soldados ya recubri armas de fuego, materiales de guerra

0
6
photo courtesy of Westmincom PIO

El mga soldao ya recubri diferentes clase de armas de fuego y materiales de guerra que ya abandona mga mal elementos del sociedad na provincia del Maguindanao del Sur, asegun con el militar del Domingo.

Asegun con el “Western Mindanao Command (Westmincom)”, con el mga armas de fuego y maeriales de guerra ya recubri el mga tropa del “2nd Mechanized Battalion” bajo del “Joint Task Force Central” na Sitio Meto, Barangay Kakar, Datu Odin Sinsuat, Maguindanao del Norte, del Viernes.

Asegun con el Westmincom, ta man patrulla el mga soldao cuando ya puede sila columbra mas o menos 10 armao mal elementos del sociedad serca na de ila locacion.

El mga mal elementos, cuando ya gole sila con el presencia del mga soldao, ya istindi para na diferentes direccion.

El mga soldao ya recubri mga armas del fuego de alta calibre y materiales de guerra compuesto de un calibre .30 masingan, dos rifles M-16, un M-79, y diferente clip y bala cuando ya inspecciona sila el lugar onde estaba el mga mal elementos.

Asegun con el Westmincom, el mga soldao ta continua intensifica el conducida del ofensiva para asegura el proteccion y seguridad del mga sercanos comunidad.

Si Tiniente General William Gonzales, el comandante del Westmincom, ya alaba con el tropa del 2nd Mechanized Battalion por el de ila vigilancia que ya previni el posible acto de atrocidad del mga mal elementos del sociedad. (B. Garcia)

Leave a Reply