El maga operativas del Criminal Investigation and Detection Group-9 (CIDG-9) ya aresta con un colectora de juego ilegal na municipio de Buug, Zamboanga Sibugay.
Si Coronel John Francis Encinareal, el director del CIDG-9, ya nombra con el arestao colectora como si Greta Paderanga, treynta’y nueve años el edad.
Asegun con Encinareal cay con Paderanga ya aresta maga alas siete sincuenta del lunes denoche durante el campanya contra juego ilegal nombrao como el Oplan Bolilyo na Purok veinte dos, na Barangay Poblacion, Buug, Zamboanga Sibugay.
Asegun con Encinareal ya puede recubri na posesion de Paderanga markao sincuenta pesos, maga las cosas ta usa na coleccion de apuesta de juego ilegal, y dosientos noventa’y tres pesos tayada.
Con Paderanga na lleba para na CIDG Zamboanga Sibugay Provincial Field Office para el propio documentacion. (Bong Garcia, Jr., photo courtesy of CIDG IX)